La dimenjada èra jol signe de las copas: Lòrd-Derby per l’Elèit, Luc-Nitard pels juniors. Se coneis las afichas de las finalas que se tendràn lo dimenge 10 de junh de vèspre a Perpinhan (estadi Brutus).

Rugbi de prima
 
Lo temps bèl de la prima presidèt a las doas vespradas de las mièjas finalas.
 
Dissabte, a Domèc (Carcassona), Limós rescontrèt Albi e se mostrèt mai realista per menar a la pausa (22-0) e mestrejar las volontats de retorn dels Tigres per ganhar: 28-16.
 
Dins la segonda partida, los Dragonets assuquèron d’entrada los lesinhaneses amb quatre ensages en vint minutas e una avança bèla a la pausa: 30-6. Los darrièrs 4 ensages del centre Ben Pomeroy (en partença per Warrington) dins lo darrièr quart d’ora podián pas levar la victòria als catalans: 38-26.
 
Dimenge, l’estadi de l’Agulha (Limós) aculhissiá las mièjas finalas de la Copa Nitard, la dels juniors. Entre Carcassona e Tolosa, lo primièr temps foguèt equilibrat, mas los Canaris fasián lo trauc a la represa, contravan las atacas tolosanas abans de s’envolar en fin de rescontre: 48-20.
 
Entre Lesinhan e Baó, la partida foguèt mai equilibrada e metèt de temps a causir lo venceire. Fin finala, Lesinhan prenguèt lo pas sus la valenta formacion catalana: 34-26.
 
 
Elèit 1: final decisiu en campionat
 
Ara, en Elèit 1, es lo temps de fin de la fasa tornar amb quatre jornadas per levar los dobtes sul nom dels dos mièges finalistas dirèctes e dels quatre barratgistas.
 
En cap d’aficha de la 17a jornada, dissabte 12 en fin de vèspre, lo dèrbi Carcassona-Lesinhan: los Jaune e Negre devon ganhar per esperar d’èsser barratgistas e Lesinhan deu empachar lo retorn de Limós dins lo parelh de cap.
 
Los limosencs festejaràn, dimenge XIII, lor títol de campion de 1968 amb la recepcion d’Albi. Avinhon reçauprà los Dragonets. Sant Gaudenç en recebent Tolosa e Palau a Vilanòva voldràn ganhar per demorar en corsa pels barratges.
 
 
Elèit 2: lo VARL e Entraigas passan los barratges
 
La fasa finala del campionat d’Elèit 2 s’es lançada amb lo debanament de las partidas de barratge. Lo Vilagalhenc-Argon Rugby-League a esperat la fin de la partida per s’envolar fàcia a Carpentràs: 48-16, alara que l’Escura anava ganhar a Entraigas: 33-28.
 
En mièja finala, per trapar lo camin de la finala al Barcarès lo dimenge 27 de mai, Vilafranca de Roergue reçauprà los tarneses e lo VARL anirà a Baó.
 
 
Tolosa a la nhaca
 
En Championship, dissabte a Blanhac, lo Tolosa Olimpic recebiá un concurrent dirècte per la segonda plaça: Featherstone. Los occitans prenguèron l’avantatge just abans la pausa (12-10) e accelerèron dins lo segond temps per ganhar 36-10.
 
Dins una quinzenada, los tolosans tornaràn trapar los primièrs: Toronto a Newcastle en dobertura de la Dimenjada Magica de Superliga.
 
 
Los sants son infernals
 
Pas de miracle dijòus de ser pels Dragons Catalans cò del cap de fila Saint Helens e una novèla desfaita 26-12 que los remanda tornar en darrièra plaça del classament. Dissabte, a Brutus, es l’esquipa de Championship de Whitehaven que vendrà disputar un 8n de la Cup.
 
 
NRL: la jornada dels indigènas
 
En Austràlia, los Dragons de Sant Jòrdi Illawarra gardan lo cap del classament amb una polida victòria suls campions de Melbourne: 34-14.
 
Las partidas d’aquesta fin de setmana marcan l’Indigenous Round, un biais de celebrar la plaça dels pòbles autoctòns dins l’istòria d’Austràlia e l’apòrt bèl dels aborigènas al rugbi de 13. Las 16 formacions d’NRL jògan amb de malhòts inspirats de las pinturas aborigènas.
 
 
Lo XIII en occitan
 
Dins l’emission Cinquième Tenu de RCF-Pays d’Aude d’aqueste dimars 8, una pagina serà consacrada a l’esquipa de XIII de Posòls de Menerbés a la debuta dels ans 1950 amb una entrevista en occitan de Jò Salès (se pòt escotar en dirècte o en podcast).
 
 
 
 
Alan Roch