Caldrà aver una vision planetària del XIII aquesta setmana amb lo debanament del rescontre internacional Anglatèrra-Nòva Zelanda aqueste dissabte 23 de junh a Denver, ciutat americana de Colorado. Mas, es pas çò tot: l’NRL parla de dobrir son campionat 2019 per un rescontre a Los Angeles. Nòva York poiriá organizar lo Magic Week-End 2019 amb -benlèu-, la preséncia de Toronto plan plaçat per la montada en Superliga. Lo campionat estatsunidenc 2018 ven de començar amb un dotzenat de formacions . De tot biais, se sap ja que la Copa del Mond 2025 se debanarà als Estats-Units e en Canadà. En esperant…
 
 
Superliga: raubatòri al pè dels pals
 
Aqueste divendres, los catalans jogavan una partida decisiva per la seguida de la sason cò dels Gigants d’Huddersfield. En arribant a l’estadi, saupèron que i auriá pas lo vidèo per aquel rescontre. Menèron 18-0, puèi 24-6 abans de dintrar als vestiaris amb un avantatge de 24-14. Los Sang e Aur faguèron l’error de contunhar a jogar en plaça de gerir. Los angleses tornavan a egalitat. Gigòt passèt un tombat, los Gigants repliquèron per una penalitat per menar 26-25. Benjamin Julien puntava l’ensag segon l’arbitre central e l’arbitre d’en-but mas l’arbitre de tòca auriá vist un endavant. Bird jogava un tengut al pè dels pals, un Gigant lo geinava, mas l’arbitre decidissiá una mesclanha pels angleses puslèu que la penalitat pels catalans. Lo president Guasch fulminèt, mas los Dragons se trapan amb 3 punts de retard sus Huddersfield (8n) e Leeds (7n). Aqueste dimècres, jogaràn lor partida de retard a Leeds. Tant digam que serà malaisit d’anar quèrre la 8a plaça e la qualificacion dins lo Super 8. Per la segonda annada de seguida, los catalans van cap a la pola de monta-davala Superliga-Championship.
 
En Championship, Tolosa aviá l’escasença de faire lo trauc darrièr Toronto al classament amb la partida deslocalizada a Albi contra Leigh. Mas los occitans s’inclinan de dos punts: 18-16 e se trapan jos la menaça de Leigh, Londres, Featherstone e Halifax per las 3 plaças que demòran per acompanhar Toronto dins aquela pola de monta-davala. Aqueste dimenge 24, Tolosa jogarà a Rochdale.
 
 
Elèit 1: Avinhon e Lesinhan passan los barratges
 
Las doas partidas de barratge foguèron plan disputadas e calguèt esperar las darrièras minutas per conéisser los venceires.
 
Dissabte, a Avinhon, Carcassona pleguèt, a l’ora de jòc, en encaissant dos ensages en inferioritat numerica en seguida d’un carton jaune. Victòria dels provençals: 18-16.
 
A Lesinhan, dimenge, los albigeses contestèron longament la supremacia locala, mas un carton roge a un quart d’ora de la còrna lor i copèt las cambas. Victòria dels Molinièrs: 28-24.
 
Dissabte, en mièja finala, dèrbi audenc a l’Agulha entre lo campion Limós e Lesinhan; a Sant Estève, los Dragonets reçaupràn Avinhon. La finala se debanarà dimenge 1r de julh a cinc oras del vèspre sus l’Estadium d’Albi.
 
 
Distribucion de bloquièrs
 
Aqueste dimenge, a Trentels, Pià ganha lo bloquièr de Nacionala 1 contra Tolon: 34-21. Es possible e probable que las doas informacions intègren l’Elèit 2 per la sason venenta.
 
En Nacionala 2, victòria de Trentels fàcia al Barcarés: 30-14.
 
Dimenge 24, a Cavalhon, son programadas doas oposicions Aude-Vauclusa amb la finala de Federala 1 ont s’opausaràn Pomàs e Caumont e la de Federala 2 que se jogarà entre la resèrva de Vilagalhenc-Argon e Caval Blanc.
 
Mièjas finalas dins lo campionat junior d’Elèit aquesta dimenjada amb d’un caire Avinhon-Lesinhan e de l’autre Catalans-Tolon.
 
Aqueste dimenge 17, a la Ròca d’Anteron, los Dragons Catalans an représ lo bloquièr de campions del 13-cadieral amb una victòria fàcia a Avinhon: 43-29.
 
 
Los Blaus o los Marrons?
 
Autre rescontre internacional, dissabte en Austràlia, entre las seleccions de Tònga e de Samoa, d’una part e entre Fidji e Papoasia, d’autra part.

 
E dimenge, retorn de la partida de las partidas amb lo segond rescontre dels Estats d’Origina a l’ANZ-Estadium de Sydney: aprèp lor victòria 22-12 a Melbourne lo 6 de junh, los Blaus de Nòvas Galas de Sud emportarián la tièra 2018 se ganhan, mas los Marrons de Queensland faràn lor possible per que la decision se faga per la tresena partida lo 11 de julh a Brisbane.
 
 
 

Alan Roch