Los Dragons petan lo fuòc
 
A Wakefield, los Dragons encaissèron lo primièr ensag tre la cinquena minuta, mas Greg Bird replicava al quart d’ora de jòc. Los catalans ajustavan tres ensages (Jullien, Mead, Williame). Drinkwater ne transformava dos, mas sa penalitat mancada se metamorfosava en un ensag anglés a l’autre cap del terren. 22-12 pels Sang e Aur a la pausa. L’ancian Dragon Justin Horo permetiá a Wakefield de tornar a 4 punts dels catalans a la 55a minuta. Drinkwater passava una penalitat, Gigòt i anava de son tombat e los catalans confortavan la victòria per dos novèls ensages dins las darrièras dètz minutas (Williame, Yaha) per ganhar 35-18. Los catalans tornan atal a nautor de lor adversari del jorn e gardan un punt d’avança sus l’uiten Huddersfield qu’aviá ganhat dijòus 29-18 fàcia a Hull FC e 3 punts sus Leeds batut a Castleford 42-10. Encara tres partidas per confirmar aquesta plaça dins lo Super 8: se los Sang e Aur ne ganhan una e Leeds ne pèrd una, l’afar serà dins la saca! Los catalans demòran en Anglatèrra per afrontar Warrington tre aqueste dijòus de ser (partida retransmesa en dirècte sus BeIn Sports).
 
 
Tolosa se complica la vida
 
En Championship, fòra Toronto, se sap pas lo nom de las autras tres formacions que disputaràn l’8-del-Mitan amb los darrièrs 4 de la Superliga per considerar la montada al nivèl superior la sason venenta.
 
Amb la recepcion de Londres, Tolosa defendiá sa segonda plaça e podiá prene de distància amb aqueste adversari dirècte per la qualificacion. A dètz minutas de la fin, los occitans menavan 20-12, mas a la còrna la marca èra egala a 20 pertot.
 
Demòra a Tolosa dos desplaçaments en Anglatèrra a Barrow (dimenge 15) e a Halifax, pretendent a la qualificacion (dimenge 22) abans la recepcion de Dewsbury a Blanhac lo 28 de julh per confirmar lor plaça dins los quatre de cap del Championship. 
 
 
Queensland per l’onor
 
Aqueste dimècres, a Brisbane, se debanarà la tresena partida dels Estats d’Origina; Nòvas Galas del Sud a ja ganhat la tièra 2018 amb las doas victòrias a Melbourne e Sydney. Demòra als Marrons la volontat de ganhar almens una partida: aquí tot l’enjòc del rescontre.
 
En campionat NRL, son de notar las victòrias de la Tempèsta de Melbourne sus Sant Jòrdi Illawarra 52-30 e lo 36-4 passat per las Pantèras de Penrith als Combatents neozelandeses aparentament desmobilizats. 
 
Al classament, los Dragons de Sant Jòrdi sèrvan la primièra plaça amb dos punts d’avança sus la Tempèsta, los Lapinons e las Pantèras. Los neozelandeses son a 4 punts e a 6 punts, se trapan los Poletons, Cronulla e Brisbane, plan plaçats per la qualificacion pels quarts, vist que los novens, los Raiders, se trapan a quatre punts d’aqueste qüatuor.
 
 
Lesinhan sens tribunas
 
En Elèit 1, dins la setmana, Lesinhan anonciava lo cambiament d’entraïnaire: l’experiéncia Fakir s’arrèsta al cap d’una annada, e es Olivièr Janzac que prendrà la relèva. Puèi, dimenge de matin, los pompièrs podián pas atudar lo fuòc al Molin: las istoricas tribunas de fusta son cremadas.
 
 
Los angleses a la plaja
 
Es al Barcarés aqueste dimars 10 e aqueste divendres 13 que s’opausaràn las formacions capdèts de França e d’Anglatèrra.
 
 
 
 
Alan Roch
 
 
 
<br /><br /><a href="https://www.jornalet.com/socis" target="blank"><img alt="abonar los amics de Jornalet" id="Abonar los amics de Jornalet" src="https://www.jornalet.com/imatges/images/SOCI.jpg" /></a>