Dobrirem aquesta cronica en saludant l’esquipa de França amb la dobla victòria de la formacion dels capdèts occitans e catalans contra los angleses al Barcarés: 24-20 lo dimars 10 e 25-16 lo divendres 13. Òsca! E ara, los U-19 son a preparar lo torneg europèu en Serbia amb la finala coma objectiu, e se ne vira, lo trofèu.

Los Dragons cap al Super-8
 
Dijòus de ser, los Dragons èran en cò dels Lops de Warrington. La partida foguèt equilibrada dins lo primièr temps que vegèt los catalans tornar al vestiari amb un avantatge de dos punts: 20-18. Lo segond temps foguèt mens prolific: los angleses passèron doas penalitats e los Sang e Aur, una. 22-22 a dètz minutas de la fin. Cada formacion ensagèt d’ensacar un tombat, l’arbitre-vidèo refusèt un ensag als Lops que tombèron la darrièra palma. Aquela egalitat met los catalans en bona posicion d’aitan mai que Wakefield e Leeds se neutralizèron divendres de ser: 20-20.
 
Demòra als catalans de signar una victòria aqueste dissabte a Brutus, fàcia a Salford, per assegurar la participacion al Super-8.
 
 
Tolosa cap als 8-del-Mitan
 
Dimenge de vèspre, lo Tolosa Olimpic foguèt sens pietat per Barrow en tèrra anglesa: los Blau e Blanc marcan 14 ensages per una larga victòria 72-6. Londres bat Halifax: 20-18. E es justament a Halifax qu’aniràn jogar los occitans aqueste dimenge, alara que Londres e Featherstone jogaràn una partida decisiva per la participacion al 8-del-Mitan, la pola de qualificacion per la Superliga de 2019.
 
 
Los Marrons salvan l’onor
 
Dins los Estats d’Origina, aprèp las desfaitas de Melbourne e Sydney, demorava a Queensland de salvar l’onor contra los Blaus de Nòvas-Galas del sud aqueste dimècres a Brisbane. Coma de costuma, l’engatjament foguèt dels bèls e Queensland arribèt a sas fins: victòria 18-12.
 
En NRL, los Lapinons van batre Canterbury 24-6, Melbourne ganha d’un punt a Manly 14-13; los Combatents neozelandeses van batre Brisbane 26-6; los Dragons de Sant Jòrdi-Illawarra son batuts pel primièr còp de l’an sus lor pelena: 20-16 pels Tigres.
 
Al classament, los Lapinons son primièrs (28 pts) amb 2 punts d’avança sus Melbourne e Sant Jòrdi e quatre sus un quatüor: Polets, Penrith, Cornulla, Combatents-NZ. Lo darrièr qualificat per las pelhòfas deuriá èsser Brisbane qu’a 4 punts d’avança sus Canberra e los Tigres.
 
 
Preparar la sason venenta
 
Del costat de Lesinhan, òm se demanda cossí tornar bastir las tribunas aprèp l’incendi de la setmana passada. A Carcassona, es lo club que s’es a tornar bastir aprèp la liquidacion judiciària de l’ASC a la fin de junh. Un grop motivat prepara un projècte ambiciós per que Carcassona demòre una plaça fòrta del XIII. Vilanòva fa apèl a Julian Rinaldi que portèt sas colors abans una carrièra als Dragons e en Anglatèrra per èsser l’entraïnaire dels Leopards la sason venenta.
 
 
 
 
Alan Roch