La polícia d’Hong Kong a arrestat Jimmy Lai, una de las principalas figuras de l’oposicion pròdemocracia e fondador del grop mediatic Next Media, que publica lo jornal Apple Daily. L'arrestacion l’an facha en aplicant la polemica lei de seguretat nacionala aprovada per Pequin. A mai, la polícia a arrestat dos filhs del jornalista e divèrses membres del burèu del grop mediatic e a perquisicionat la redaccion d’Apple Daily.
 
Coma o publica lo quite Apple Daily, l’acusan d’aver mancat a l’article 29 de la lei de seguretat nacionala, qu’enebís la conspiracion amb un país estrangièr o institucion, organizacion o individú per menar a una guèrra, falsar d’eleccions, empedir l’aplicacion de la lei o lo trabalh de la polícia e provocar l’òdi dels hongkongueses envèrs los govèrns local e chinés amb d’intencions illegitimas. La non-observacion d’aquel article se punís amb de penas d’entre tres e dètz ans de preson o quitament a perpetuitat. En mai d’aquò, Lai èra ja mes en examen per d’autres delictes coma lo de reünion illegala per las protèstas a Hong Kong de l’an passat.
 
A 73 ans, Lai èra estat senhalat prèviament pels mèdias oficialistas chineses coma un dels promotors de l’oposicion hongkonguesa. Dins aquel sens, The Global Times lo definís coma un “traite modèrne” e ditz qu’es pauc probable que pòsca sortir en libertat, quitament en pagant una caucion, e mai afirma que lo dissident aurà d’afrontar de “fòrtas punicions”. Aquel quotidian oficialista anóncia tanben que se prevei d’autras detencions.
 
Qualques oras après la detencion de Lai dins son ostal, de centenats de policièrs intrèron dins la redaccion d’Apple Daily en confiscant de documents. Sul pic, los jornalistas comencèron d’emetre un vidèo en dirècte de la perquisicion.