Tres meses après l’espelida de las protèstas ciutadanas massissas, de centenats de personas abilhadas en negre manifestèron dissabte passat per las carrièras de Santiago de Chile per fin de protestar contra las violacions dels dreches umans que se tenon en aquel país.
 
“Aquesta marcha es silenciosa perque volèm demostrar d’un biais non violent la granda repercussion que l’a la violacion dels dreches umans sus la vida de las personas”, çò disiá una manifestanta. Encara un autre manifestant assegurava que caliá arrestar sul pic la criminalizacion de las protèstas: “Lo mond quitarem pas de sortir per carrièras se s’escota pas las demandas de la societat”. A mai, los manifestants assolidan que los politicians devon arrestar de creire que los pòdon “comandar e manipular”.
 
Las protèstas en Chile espeliguèron en octòbre contra la quatrena pojada del prètz del mètro e cresquèron força rapidament fins a denonciar las inegalitats socialas e prepausar lo besonh d’una novèla Constitucion. Lo president de Chile, Sebastián Piñera, qu’aviá quitament declarat l’estat d’emergéncia e mobilizat l’armada, demandèt perdon per aver pas escotat lo clam dels chilens e prepausèt una “agenda sociala”. Per la far venir realitat, reformèt lo govèrn e entamenèt un dialòg amb los partits politics, tant los opausants coma los oficialistas.
 
Dins aquel contèxt, mai d’un vintenat personas son mòrtas a causa dels afrontaments entre los manifestants e las fòrças de seguretat. En mai d’aquò, l’Institut Nacional dels Dreches Umans (INDH) de Chile a calculat que lo nombre de personas nafradas durant las protèstas es de 3649. Segon lo rapòrt de l’INDH, 405 personas an patit de plagas als uèlhs: 372 son lesionats del temps que 33 an perdut completament l’uèlh.