Bandièra01 1180x150: Comuna de Tolosa

Actualitats

L’Assemblada de Polinesia a demandat a França qu’organize un referendum d’autodeterminacion

Lo president autonomista vòl emplegar lo vòte per demostrar que los polinesians refusan la secession. L’oposicion independentista vòl que se faga un “procès de descolonizacion” abans lo referendum e prepausa la creacion d’un estat federal polinesian.


L’Assemblada de Polinesia aprovèt dijòus una resolucion que demanda al president de la Republica Francesa qu’“implemente lo procediment d’autodeterminacion” per que se convòque un referendum dins aquel país d’otramar francés. La resolucion aguèt lo sosten dels 46 deputats autonomistas de la cambra polinesiana, mentre que los 11 deputats independentistas boicotèron lo vòte.
 
La resolucion es una iniciativa del govèrn autonomista polinesian, que Gaston Flosse lo dirigís dempuèi las darrièras eleccions de fa un mes. Flosse vòl que se convòque immediatament lo referendum, coma responsa a la reïnscripcion de Polinesia dins la lista de las Nacions Unidas dels territòris non autonòms. Lo president polinesian crei que i a una granda majoritat en Polinesia contra l’independéncia, e o vòl demostrar en un vòte oficial. Un sondatge recent ditz que, se se convoquèsse un referendum, los polinesisans refusarián largament la secession.
 
Mas lo cap independentista e èx-president polinesian Oscar Temaru es contra la decision de l’Assemblada. Mai que mai, perque la cambra a aprovat tanben una autra resolucion disent que Polinesia es ja un territòri autonòm dins França.
 
Segon Temaru, abans de far lo referendum, caldriá menar a tèrme un “procès de descolonizacion”. Lo cap independentista a dich tanben qu’als franceses nòuvenguts en Polinesia lor caldriá pas aver drech de vòte al referendum. Flosse, per contra, considèra que totes los ciutadans actuals de Polinesia —impòrta pas se son nascuts al territòri oceanian o non— aurián de poder votar.
 
 
Temaru prepausa un estat polinesian federal
En pensant a un scenari après lo referendum, e se la secession ganhèsse, Temaru diguèt fa qualques jorns a la television locala TNTV que lo país deuriá venir los “Estats Federats de Polinesia”. Aquò rebatriá la diversitat intèrna de Polinesia, formada de cinc archipèlas principals ont se parla divèrsas lengas (tahitian, marquesian, tuamotuan, mangarevian, austral e rapa).
 
 
 

 
 
 
 

 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Terric Lausa Quilhan
1.

" Segon Temaru, abans de far lo referendum, caldriá menar a tèrme un “procès de descolonizacion”

Plan segur! E pensi a los que dison que se i agèsse un referèndum per l'independéncia en Occitània, lo restaquisme ganhariá. Plan solide: Occitània es a descolonizar e desalienar çò primièr.

  • 5
  • 0

Escriu un comentari sus aqueste article