Lo 23 d’octòbre de 2024, una reünion Zoom “brutala e brèva” marquèt una virada dins l’istòria de Duolingo, la populara plataforma d’aprendissatge virtual de lengas e de traduccion. SegonLibération, los responsables de las ressorsas umanas anoncièron pendent aquela amassada a mai o mens 200 trabalhadors independents que serián progressivament remplaçats per d’intelligéncia artificiala (IA). Una anóncia que, segon un ancian collaborador, nomenat John per escondre sa vertadièra identitat, foguèt pas totalament una suspresa, mas qu’a pasmens daissat un gost amar.

Lo president-director general de Duolingo, Luis von Ahn, confirmèt oficialament aquela estrategia en abril passat, declarant que son entrepresa vendriá “AI first”, valent a dire que privilegiariá l’IA dins totas sas operacions. Malgrat que la decision de se passar dels traductors umans siá estada anonciada publicament ara, sembla qu’aquela transicion auriá ja començat mantun mes de per abans, sens vertadièrament n’informar los trabalhadors concernits.

D’efièch, John conta que, tre genièr de 2024, de supressions de contractes an agut luòc, e que cèrts reviraires se son retrobats sens emplec. Dins lo meteis temps, Duolingo a investit massissament dins l’intelligéncia artificiala, en integrant d’espleches coma GPT-4 per gerir la creacion de contengut lingüistic. S’aquelas tecnologias novèlas permeton a l’aplicacion d’alargar son ofèrta de cors e de melhorar son eficacitat, lèvan tanben d’interrogacions: se pòt vertadièrament remplaçar l’uman per una maquina sens riscar d’aver errors dins l’aprendissatge de las lengas?

Los ancians trabalhadors de Duolingo, qu’avián contribuït a la creacion dels exercicis e de las traduccions, se senton traïts. Estiman que l’IA, totun eficaça, es pas encara perfiècha, e que lor ròtle dins l’elaboracion del contengut es estat sosestimat. La situacion pausa de questions eticas e practicas: se pòt far fisança a una maquina per ensenhar las nuanças d’una lenga?

Luis von Ahn, de son costat, tempta de rassegurar en afirmant que los “Duos”, escais jol qual son coneguts los emplegats permanents de l’entrepresa, seràn pas remplaçats. Pasmens, a tèrme, l’IA poiriá plan jogar un ròtle de mai en mai central dins los procèsses de recrutament e d’avaloracion.

De remarcar tanben que, malgrat una dobertura a divèrsas lengas minorizadas coma lo catalan, l’hawaiian, lo guaraní, lo galés, los gaelics d’Escòcia e d’Irlanda, demest d’autras, l’aplicacion totjorn que mai controversiada malgrat sa popularitat prepausa pas l’occitan.