Bandièra01 1180x150: Comuna de Tolosa

Actualitats

Lo govèrn de Catalonha presenta una alternativa al referendum

Lo president Artur Mas a anoncièt una “consulta” amb d’autras règlas que l’estat espanhòl poiriá pas suspendre, e que serà seguida d’una eleccion plebiscitària per menar al Parlament de Catalonha una majoritat de partits amb la tòca exprèssa de declarar l’independéncia.


Lo president de la Generalitat de Catalonha, Artur Mas, anoncièt ièr de matin la disposicion a tirar endavant lo referendum consultatiu del 9 de novembre, mas dins un autre encastre legal qu’aquel suspendut pel Tribunal Constitucional a la demanda del govèrn d’Espanha. Lo president catalan volguèt pas dire qual seriá aquel nòu encastre legal —“aqueste còp los prevendrem pas”, çò diguèt— en tot remarcar que “l’adversari real es l’estat espanhòl”. Pasmens, anoncièt que la consulta del 9 de novembre seriá una “consulta anticipada”, prèvia a una “consulta definitiva” que seriá una eleccion plebiscitària per aver una majoritat dins lo Parlament, victoriosa a las eleccions, amb la tòca exprèssa de declarar l’independéncia de Catalonha.
 
Artur Mas demandèt als partits que diguèsson se sostenon son plan, mas precisèt que lo govèrn es determinat a complir lo plan: “Lo govèrn es decidit a far la consulta lo 9 de novembre. Lo govèrn manten l’objectiu de far la consulta lo 9 de novembre. I aurà de locals dobèrts, d’urnas e de bulletins”.
 
“Tota la populacion de mai de setze ans poirà anar votar als locals amb d’urnas. La consulta se farà pas segon lo decret que ieu meteis signèri, perque lo Tribunal Constitucional a pas levat la suspension. Lo govèrn prepararà tota la logistica necessària. Mobilizarem mai de vint mila volontaris als burèus de vòte. Demandarem lo sosten de las comunas e las entitats. Totes los locals seràn de la Generalitat”.
 
La compareissença d’Artur Mas als mèdias se passèt en seguida d’una reünion dels partits favorables al referendum que capitèt mal. ÈRC es pas d’acòrdi per remplaçar lo referendum per un procès participatiu. La CUP organizèt una assemblada informativa sus la Plaça Sant Jaume de Barcelona per explicar çò que se’n parlèt dins aquelas reünions. Capitèron a acampar de centenats de personas e l’assemblada contunhèt suls rets socials. Aquí se critiquèt lo tacticisme dels partits e se remarquèt que cal priorizar l’interès comun.





El govern convoca un nou 9-Nper vilawebtv

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mathieu Castel Marselha
1.

A tè, ieu que pensavi anar a Barcelona per lo 9 de novembre, espèri que se debanarà pasmens quauquaren aquela dimenchada !

  • 0
  • 0

Escriu un comentari sus aqueste article