→ Espòrt/Pro D2: Levat lo costat judiciari del capmèstre sieu, que foguèt inculpat, la Trump Company crompèt lo RC Narbona! Novèl actionari, novèl eslogan: “Orange Is Life!”. Lo club de fotbòl francés de Laval es a soscar per cambiar lèu-lèu las sieunas colors.

→ Ecologia: 18 000 vacas se moriguèron amb l’explosion d’una bòria als Estats Units - Texas. Lo camin lo mai cort pas jamai vist, saique, per la transformacion de vacas en bistècs espepissats, a mai cuèches.

→ Sapiéncas/Espacial: Partiguèt, cap al sitèma Jupitèr, la sonda JUICE. 8 ans de viatge: Aribarà per la darrièra annada del mandat presidential de la Le Pen. Es a dire s’es long...

→ Economia 1: Es valorizat per 210 miliards d’euròs lo grop LVMH, ongan, amb una creissença de 17% per 2022.

→ Economia 2: Augmentarà de 2,19% lo SMIC lo pus primièr de mai. L’inflacion es l’atorn de 6%, ela.

→ Politica 1: Se faguèt arrestar un can dins lo Doubs, lo 27 d’abrial passat, per lo Dark Manin. “Jaupèt fòrça al passatge del President! Es un acte teroriste!”. La senténcia tombèt sul pic: D’oras de OIG (Obras d’Interèst General) en çò de LVMH. De fach, encontrarà al conilh de Play Boy que trobèt de trabalh a tastar de maquilhatge, el tanben.

→ Autò: Sortirà per la prima 2024 la BX de Citroën en version electrica, de segur. Vincent Cobée (PDG): “Amb la visibilitat giganta dins “La Seria”, avèm de milierats de demandas! I aurà tanben un version numerotada, fins a 500, amb la crotz occitana” (A despart: Es totjorn disponibla sus FranceTV “La Seria” per los trigaires)

→ Politica 2: Biden serà lo candidat democrate per las eleccions venentas als Estats Units.

→ Astronomia: Lo nuclèu de Març seriá liquid. Pas cap de ligam amb l’infò anteriora...

→ Premsa/Judiciaria: Presentèt una denònçia en çò del comissaiat de la Polícia de Tolosa un legaire de Jornalet. “Me soni Pascal Anonim, es lo nom d’ostal mieu. Foguèri censurat mai d’un còp la setmana passada. Es de discriminacion!”.