Bandièra01 1180x150: Comuna de Tolosa

Opinion

L’empatia se comanda pas!

L’empatia se comanda pas!
L’empatia se comanda pas!
Andriu de Gavaudan

Andriu de Gavaudan

Autor de la cronica occitana setmanièra al Petit Bleu de l’Agenais desempuèi 1978 e editorialista de La Setmana fins que quitèt de paréisser

Mai d’informacions

Seriá donc pas que los que contan colhonadas o que desparlan que recebrián letras de legèires enrabiats o en desacòrdi amb los prepausses tenguts? Alara, soi un engèni! O sabiái de segur mas seriá confirmat…

Seriá donc que la lenga qu’escrivi es d’una qualitat tan nauta que los que me legisson ne son tot embalausits al punt de voler formar un comitat per demandar la creacion d’un prèmi especial de “lenga illustra”? Ne seriái pas estonat!

Es pas la pena de rafir las ussas en pensant qu’ai virat canturla… E espèri qu’avètz comprés que galejavi mas, jos la galejada, i a un embarràs pregond. Es que soi a cercar de qué vos poiriái parlar que foguèsse pas depressiu. Parlan del rescalfament climatic mas l’aiga del riu que causiretz per vos anar negar es encara fresqueta e, en cas que los pèisses volguèsson pas de vos en causa de la pollucion, seriatz fotuts — al mens un o dos — de me far un procès per aver agantat un raumàs… De tota faiçon, seriá pas rasonable, un comportament aital, vos dirián los qu’aiman de far de rasonaments e, ieu, soi a ne far!

A agachar, escotar o legir los mèdia, Tout va très bien, madame la marquise! En cò nòstre e sul planeta.

A l’estrangièr — e pas unicament en los Estats Units — un fum de caps d’Estat en activitat an decidit de far lo bonaür de lor pòble volens nolens sens s’embarrassar d’una democracia totjorn tròp longa a metre en òbra e a far viure sustot amb de mond que comprenon pas los sacrificis de lor líder.

Nòstre vesin del Kremlin, un “orfanèl” traumatizat per la desaparicion del mot sovietic de las gasetas ne foguèt tan macat que tanlèu que poguèt partiguèt en crosada contra los qu’avián virat l’esquina a la santa maire Patria. Comencèt pels pichonels e coma los païses de l’Union europèa — en desòrdre — avián d’uèlhs pas que per son òli, tot se passèt plan o quasi fins al moment ont volguèt engolir un pèis un pauc gròs relucat pels capitalistas europèus.

Lo mèstre de Minsk, aviá declarat al moment de la revòlta de “son” pòble a prepaus de las eleccions farlabicadas qu’aviá pas fach tot aquò — sens jamai explicar son “tot aquò” — per se far caçar del poder coma un servicial d’un ostal de borgeses; ara, per i demorar, li cal servir de bessonet al psicopata de Moscòu.

Aqueles dos son un pauc embestiats amb la reaccion de l’Union europèa — e dels Estats Units; los dirigents aguèron l’an passat un descluc un pauc brutal… e las poténcias europèas — las pichonas son pas de comptar! — descobriguèron espantadas que pendent annadas s’èran daissadas enganar per de promessas sens fondament…

Ça que la, aquela puta d’òli… Calriá pas grand causa per que d’unes cambièssen de tòç!

Africa als Africans! Pensatz! En Sodan, dos generals vòlon èsser califa: un, califa crestian, l’autre, chariacompatible! Los “enemics”, armada e milícia, tuan mai de civils que non pas los adversaris…

Africa centrala… La milícia Wagner a ajudat los dirigents de qualques païses a caçar los soldats de l’èx-poténcia coloniala que contunhava una especha odiosa de las riquesas!!!

En America Latina, Chile, Brasil, Argentina, etc. son mai en mai pròches del grand ser! Los Chilens refusan una constitucion “democratica”, los Argentins ensajan de subreviure e lo quite Lula, brasilièr tornat president, a de presas de posicion curiosas pels qu’an conegut lo Lula de la primièra presidéncia.

Xi chineza e Trump trumpeja…

A quicòm pròche, es çò qu’entenèm cada jorn e parli pas de not’ bon président que, en volent far anar drecha e esquèrra en meteis temps, es mai sensible a las serenas de drecha e d’extrèma drecha.

L’empatia se comanda pas!

 

 

 

 

 


P.S. Mèfi! D’unas frasas, a còps, son pas a prene al sens literal… S’es pas d’umor negre, se vòl d’umor!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article