Los Dragons an plan festejada la victòria en Cup: recampament bèl al Castelet e taulejada a Brutus diluns de ser, passatge del president de la Generalitat divendres, convit a presentar la Cup en dobertura de la partida Barça-Girona al Camp Nou lo dimenge 23, articles dins la premsa esportiva e al delà…
 
 
Lo Super-8 contunha…
 
Mas caliá tornar trapar la pelena. Dissabte, los Tigres de Castleford sortiguèron las urpas bèlas e longarudas per batre los Dragons: 36-4.
 
Dijòus, los Lops de Warrington se remetèron de la desfaita de Wembley en esclafant 80-10 una transparenta esquipa d’Hull FC. Divendres, lo segond Wigan anèt ganhar cò del primadièr Saint Helens 30-10 alara que Wakefield ganhava cò dels Gigants d’Huddersfield 42-16.
 
Dissabte, en fin de vèspre, a Brutus, partida de gala e revenge de la mièja finala de la Cup entre los Dragons e los primadièrs Saint Helens.
 
 
Tolosa manda los Vikings pel fons
 
Dins los 8-del-Mitan, Salford pren una opcion bèla sul manten en Superliga amb la victòria 62-4 a Halifax. Hull KR capita de véncer a Leeds: 38-36. Toronto s’impausa fàcia a Londres 34-22. Hull, Leeds e Toronto se trapan amb 4 punts en companhiá de Tolosa.
 
Los occitans recebián a Blanhac los Vikings de Widnes, pensionaris (mas darrièrs) de la Superliga ongan, ja batuts per Londres e Salford. Keirallah dobrís lo planchòt, mas los angleses marcan dos ensages e menan 10-6 (25a). Ford tusta per en sus de la defensa e Keirallah marca son segond ensag. Centrone recupèra una palma dins los dètz mètres occitans e travèrsa tot lo terren per puntar l’ensag. A la pausa, Tolosa mena 18-10. A la represa, los angleses marcan, mas los Blau e Blanc passan quatre còps la rega blanca, los angleses replican un sol còp e daissan la victòria als occitans: 42-22.
 
Lo viatge a Londres, dimenge, serà important pels tolosans que prendràn puèi la direccion de Toronto e comptan sus totes los sostens pel rescontre del 22 de setembre a Blanhac fàcia a Hull KR.
 
 
NRL: plaça a las pelhòfas
 
En Austràlia, la primièra fasa a liurat son verdicte amb un classament sarrat: los primièrs 4 an 34 punts e los quatre seguents 32 punts.
 
Dins lo naut del tablèu, los Polets (1r) reçaupràn dissabte las Làmias (4as) e Melbourne (2d) reçauprà dijòus los Lapinons (3n). Los ganhants seràn qualificats per las mièjas finalas e los perdents poiràn passar pels barratges contra los venceires, d’un caire, de la partida Penrith (5n) contra los Combatents neozelandeses (8n) que se jogarà dissabte, e d’autre caire de la partida Brisbane (6n) contra los Dragons de Sant Jòrdi Illawarra (7n), que clavarà dimenge aqueste primièr torn de las pelhòfas. 
 
 
 
Alan Roch