Actualitats
Rugbi de XIII: pluèja e ventòrla, convidadas de la dimenjada
Las condicions meteorologicas joguèron un ròtle de primièra dins lo debanament de las partidas de XIII en Anglatèrra, Occitània e Catalonha
Los Dracs enfangats
Dijòus, la Superliga se dobriguèt amb una brava suspresa: los Lops de Warrington, amb lo provençal Benjamin Jullien sus la pelena, anèron batre los campions, Leeds: 12-10.
Coma fa una quinzenada que plòu sul nòrd d’Anglatèrra, lo terren de Wigan èra un fangàs. Lèu, amb dos jogaires nafrats (lo pilar Anderson e lo talonaire Aiton; pel papó, se parla ja de trapar un joquèr medical), los Dracs paguèron al prètz fòrt doas fautas de man transformadas en ensag per Mac Illorum. A la represa, Justin Horo marcava sus un còp de pè a seguir del mesclanha Miller; mas foguèt tot, los angleses passèron una penalitat e ganhèron 12-6. Cal trapar lo ligam e la bona carburacion entre totes los nòuvenguts e los ancians cò dels catalans.
E lèu, qu’aqueste dissabte 13, los Dracs recebràn los primièrs de la classa, Hull FC, qu’a passat 42-20 a Salford.
Autras resultas: victòria de St Helens sus Huddersfield: 30-16; de Widnes a Wakefield, 24-16; e egalitat entre Hull KR e Castleford, 16-16.
Los catalans portats per la tramontana
Abans la darrièra jornada de la primièra fasa, lo calendièr d’Elèit 1 s’actualizava. Dissabte, als Minims, los dos Broncos, Tolosa e Palau, se quitèron sens venceire: 20-20. Dimenge, al Molin, dins lo dèrbi entre Corbièras e Blanqueta, las doas formacions faguèron jòc egal fins a l’ora de jòc. Los Molinièrs manquèron un 2 contra 1 imparable e Limós signèt dins las darrièras minutas dos ensages per ganhar: 26-16. Lo punt de bònus defensiu deuriá èsser sufisent a Lesinhan per servar la tresena plaça qualificativa per la pola bèla de la segonda fasa.
A Sant Estève, los carcassoneses marquèron primièrs, mas una fauta de recepcion permetiá a Buche de marcar just abans la pausa: 6-4 pels vesitaires. A la represa, amb l’avantatge del vent e un Stan Robin insasissable, los catalans (qu’avián fait rampèl al maxim de Dracs que li permet lo règlament) anèron marcar ensages coma s’engolís de calçòts: 5 dins lo segond temps per una sola replica audenca: 36-10 al planchòt final.
Per clavar aqueste primièr torn, Tolosa recebrà Lesinhan tre dissabte. Dimenge, Palau recebrà Carcassona, Avinhon jogarà a l’Agulha de Limós e la partida Albi-Dragonets aurà dreit a la retransmission en dirècte sul sit de la Federacion.
Quarts de Copa
Lo tiratge al sòrt dels quarts de finala de la Copa Lord Derby prometon, pels 20 e 21 de febrièr, un afrontament entre lo mèstre del trofèu Lesinhan e sa vesina Carcassona. Per contra, Limós (recepcion de Vilanuèva), Sant Estève-XIII Catalan (desplaçament a Carpentràs) e Albi (desplaçament cò de Ferrals de Corbièras) pòdon considerar plan legitimament la qualificacion per las mièjas finalas.
D’aquel temps, a Auckland...
De l’autre costat de la planeta, la sason se dobrissiá amb lo torneg a 9 de las formacions de l’NRL. Paramatta ganha la competicion (victòria 22-4 contra los NZ Warriors en finala). A la television australiana, darrièr la retransmission de la partida de criquet Austràlia-Nòva Zelanda, la retransmission del torneg d’Auckaland ven darrièr amb tres còps mai de telespectators que lo torneg internacional a 7 de Sydney. Mas aquò, es ailalin en Austràlia...
Segond eveniment de la presason: la partida, aqueste dissabte, a Brisbane, entre las Estelas d’NRL e la formacion dels Indigènas.
Alan Roch
Dijòus, la Superliga se dobriguèt amb una brava suspresa: los Lops de Warrington, amb lo provençal Benjamin Jullien sus la pelena, anèron batre los campions, Leeds: 12-10.
Coma fa una quinzenada que plòu sul nòrd d’Anglatèrra, lo terren de Wigan èra un fangàs. Lèu, amb dos jogaires nafrats (lo pilar Anderson e lo talonaire Aiton; pel papó, se parla ja de trapar un joquèr medical), los Dracs paguèron al prètz fòrt doas fautas de man transformadas en ensag per Mac Illorum. A la represa, Justin Horo marcava sus un còp de pè a seguir del mesclanha Miller; mas foguèt tot, los angleses passèron una penalitat e ganhèron 12-6. Cal trapar lo ligam e la bona carburacion entre totes los nòuvenguts e los ancians cò dels catalans.
E lèu, qu’aqueste dissabte 13, los Dracs recebràn los primièrs de la classa, Hull FC, qu’a passat 42-20 a Salford.
Autras resultas: victòria de St Helens sus Huddersfield: 30-16; de Widnes a Wakefield, 24-16; e egalitat entre Hull KR e Castleford, 16-16.
Los catalans portats per la tramontana
Abans la darrièra jornada de la primièra fasa, lo calendièr d’Elèit 1 s’actualizava. Dissabte, als Minims, los dos Broncos, Tolosa e Palau, se quitèron sens venceire: 20-20. Dimenge, al Molin, dins lo dèrbi entre Corbièras e Blanqueta, las doas formacions faguèron jòc egal fins a l’ora de jòc. Los Molinièrs manquèron un 2 contra 1 imparable e Limós signèt dins las darrièras minutas dos ensages per ganhar: 26-16. Lo punt de bònus defensiu deuriá èsser sufisent a Lesinhan per servar la tresena plaça qualificativa per la pola bèla de la segonda fasa.
A Sant Estève, los carcassoneses marquèron primièrs, mas una fauta de recepcion permetiá a Buche de marcar just abans la pausa: 6-4 pels vesitaires. A la represa, amb l’avantatge del vent e un Stan Robin insasissable, los catalans (qu’avián fait rampèl al maxim de Dracs que li permet lo règlament) anèron marcar ensages coma s’engolís de calçòts: 5 dins lo segond temps per una sola replica audenca: 36-10 al planchòt final.
Per clavar aqueste primièr torn, Tolosa recebrà Lesinhan tre dissabte. Dimenge, Palau recebrà Carcassona, Avinhon jogarà a l’Agulha de Limós e la partida Albi-Dragonets aurà dreit a la retransmission en dirècte sul sit de la Federacion.
Quarts de Copa
Lo tiratge al sòrt dels quarts de finala de la Copa Lord Derby prometon, pels 20 e 21 de febrièr, un afrontament entre lo mèstre del trofèu Lesinhan e sa vesina Carcassona. Per contra, Limós (recepcion de Vilanuèva), Sant Estève-XIII Catalan (desplaçament a Carpentràs) e Albi (desplaçament cò de Ferrals de Corbièras) pòdon considerar plan legitimament la qualificacion per las mièjas finalas.
D’aquel temps, a Auckland...
De l’autre costat de la planeta, la sason se dobrissiá amb lo torneg a 9 de las formacions de l’NRL. Paramatta ganha la competicion (victòria 22-4 contra los NZ Warriors en finala). A la television australiana, darrièr la retransmission de la partida de criquet Austràlia-Nòva Zelanda, la retransmission del torneg d’Auckaland ven darrièr amb tres còps mai de telespectators que lo torneg internacional a 7 de Sydney. Mas aquò, es ailalin en Austràlia...
Segond eveniment de la presason: la partida, aqueste dissabte, a Brisbane, entre las Estelas d’NRL e la formacion dels Indigènas.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Per Paul Aiton, fin finala, serà solament un arrèst de 6 a 8 setmanas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari