Una dimenjada de remesa de prèmis, mas lo monde tretzista reten son buf: la primièra confrontacion dels Estats d’Origina es per aqueste dimècres 1r de junh a Sydney.
 
 
Los Catalans tornan trapar vam
 
Dissabte, los Dragons tornavan trapar Brutus aprèp la decepcion bèla de la desfaita d’un punt a Wakefield. Los sang e aur entamenavan la partida coma cal: ensages de Brougton en cap d’ala, puèi de Carney sus una passa de Taylor, lo jove Lucàs Albèrt titularizat a la mesclanha fintava la passa e marcava son primièr ensag en Super-Liga. Los angleses se rebecavan e l’ex-Dragon Larroyer marcava, mas Anderson e Gigot ajustavan dos ensages abans la pausa: 28-6. Lo segond temps foguèt mens animat e los catalans perdèron un pauc d’esperit collectiu. Lucàs Albèrt tustava a seguir, Horo en desequilibri al limit del balon mòrt remetiá la palma per Gigot que marcava. Hull-KR signava dos ensages e los Dragons l’emportavan 34-16.
 
Divendres, aniràn desfisar un campion Leeds que trigòça sa pena en darrièra posicion aprèp una desfaita 52-18 a Warrington. Hull FC confirma sa primièra plaça amb una victòria 32-24 sus St-Helens. Wigan ganha a Castleford 33-26 e Salford espèra dintrar dins los 8 qualificats aprèp sa victòria sus Wakefield: 38-8. Widnes pren sas distàncias amb Huddersfield 24-20.
 
A Brutus, en dobertura, una formacion-B dels U-19 sèrva l’invencibilitat catalana: 28-20 contra Hull, la formacion que recampa los joves de Hull-FC e Hull-KR. Mancavan, en mai del Lucàs Albèrt, los 10 jogaires partits defendre los Blaus U-18 en Anglatèrra, mas despassats 52-20 divendres a Warrington.
 
 
Primièr Estats d’Origina de la sason
 
En Australia, lo campionat NRL vira al ralentit coma es vengut lo temps de las tres partidas “Estats d’Origina” entre Novèlas Galas del Sud e Queensland. Primièr rescontre: aqueste dimècres 1r de junh a Sydney. De seguir a miègjorn (ora occitana) sus BeInSpòrt.
 
Notarem ça que la las desfaitas de Brisbana (19-18 fàcia als Tigres) e dels Vaquièrs cò de St-Jòrdi-Illawara 14-10.
 
 
Una cordelada de bloquièrs
 
Aquesta dimenjada, fòrça bloquièrs de campions trapèron preneires.
 
Tre dissabte, a Ramonvila, las finalas dels juniòrs nacionals vegèron las victòrias en Copa de St Martin de Crau (44-30 contra Marselha) e en Campionat de Vilafranca de Roergue sus Pàmias: 40-24.
 
Puèi, dimenge, en Femininas, las finalas se tenián a Frontinhan. Marselha ganha lo bloquièr minimas-capdètas 50-18, contra Aigavivas. En Division Nacionala, Marselha bat Clairac als tirs al but 22-22. En Elèit 2, l’AS Carcassona ganhèt aisidament contra lo XIII-Provençal: 74-10. En Elèit 1, Factura-Biganòs grava son nom al palmarès 22-12 contra Tolosa Ovalia.
 
Del costat d’Avinhon, carton plen pel XIII catalan: en minims, victòria fàcia al FC-Lesinhan: 14-10 e, en cabdèts, victòria 40-6 sus Tolosa.
 
A Albi, se tenián las finalas de Nacionala 2: los catalans de XIII-Salanca ganhan lo Challenge Dubarry (45-28 contra Lo Mas d’Agenés) e lo bloquièr de campion reven a Pujòls (38-22 contra Salses)
 
A Carcassona, se tenián las finalas de Nacionala-1: los audencs èran en forma. En 1-B, lo bloquièr prenguèt la direccion de Menerbés e de Vilanòva, venceire de Sauvatèrra de Comenge: 24-14. En 1-A, contra Entraigas, Ferrals de las Corbièras confirmèt 34-20 sa victòria de Copa de fa una quinzenada . E es amb aquesta cançon, en brandissent lo panèu en occitan de dintrada de la comuna, que los jogaires de Ferrals, que se definisson coma vinhairons-païsans, festejan la victòria:
   
 
 
Alan Roch