Actualitats
França, lo Reialme Unit e los Estats Units an ja començat de bombardar Siria
Per las carrièras de Damasc, los ciutadans partisans del govèrn del país festejavan l'ataca que la consideravan mancada
França, lo Reialme Unit e los Estats Units an ja començat de bombardar Siria, coma avián menaçat aquesta setmana. La primièra ataca se tenguèt sus Homs dissabte de matin e auriá nafrat tres personas, segon l'agéncia d'infomacions siriana SANA, que rapòrta que qualques unes dels missils foguèron interceptats e desviats. Las carrièras de Damasc s'empliguèron de ciutadans partisans del govèrn del país que festejavan l'ataca que la consideravan mancada. Lo bombardament respondriá a un presumit assaut del govèrn sirian contra l'armada rebèlla amb d'armas quimicas.
L'ataca durèt una ora e aviá per tòca especifica la destruccion de l'eventual programa d'armament quimic del govèrn sirian. "Ai ordenat a las fòrças armadas dels Estats Units que lancen d'atacas de precision contra de butas amb capacitat d’armas quimicas del dictator Bashshar Al Assad", çò expliquèt Trump de l'Ostal Blanc estant.
Lo Pentagòn confirmèt las paraulas de Trump e afortiguèt que las atacas se tornarián far s'Al Assad tornava emplegar d'armas quimicas.
L'ofensiva l'an menada a bon tèrme França, lo Reialme Unit e los Estats Units ensems, e a combinat d'atacas aerianas e de lançament de missils en provenença de vaissèls que son en Mediterranèa. Los sistèmas antimissils de l'armada siriana aurián abatut 13 missils de la coalicion, mas de fonts estatsunidencas rebutan aquelas informacions.
Macron justifica l'assaut
Lo president francés, Emmanuel Macron, justifiquèt l'ataca amb una fiulada sus Twitter. "Lo dissabte 7 d'abril 2018 a Doma, de desenats d'òmes, de femnas e d'enfants foguèron massacrats a l'arma quimica. La linha roja es estada franquida. Ai doncas ordenat a las fòrças armadas francesas d'intervenir".
Le samedi 7 avril 2018, à Douma, des dizaines d’hommes, de femmes et d’enfants ont été massacrés à l’arme chimique.
— Emmanuel Macron (@EmmanuelMacron) 14 d’abril de 2018
La ligne rouge a été franchie.
J’ai donc ordonné aux forces armées françaises d’intervenir. https://t.co/Vt9LcFcFzHpic.twitter.com/Dc726PHfAR
Russia respond
Aquela ataca "demorarà pas sens consequéncias", çò avertiguèt l'ambaissador rus a Washington, Anatoli Antonov. "An pas escotat nòstres avertiments. Nos tornan menaçar. Aviam avertit qu'aquelas accions demorarián pas sens consequéncias. Tota la responsabilitat aperten a Washington, Londres e París", çò declarèt Antonov.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Coma sempre, los que van ganhar aquesta guèrra seràn los fabregants de bombas !!!
Plan segur qu'aquel bombardament èra abans tot un espectacle de com'. Un biais per l'Occident (es a dire los Estats-Units, e accessoriament sos fèudals europencs) de pas pèrdre la fàcia davant son opinion publica.
Los bastiments bombardats èran totalament voides, que los sirians son estats cortesament prevenguts tres jorns a l'abança, doncas cap de mòrts, e es mai que probable que l'Assad aja agut lo temps de far transferir çò preciós o estratègic en luòc segur. Los americans (e sos supletius faire-valers engleses e franceses) an plan fach atencion de pas tròp desagradar als russes ni de los destorbar e an doncas bombardat çò que Poutine lor a autorizat a bombardar, es a dire de parpèlas d'agaça.
En despièch de las obligatòrias e convenudas protèstas russas e sirianas, en despièch de las fanfaronadas de Trump e d'aquèlas dau drollèt Macron tot fieròt de l'estrapontin-joguinha porgit pels americans, es plan Bachar el Assad e Poutine qu'an ganhat sul terrenc. Per la terror, lo brutalitge, en se trufant de totas las leis e règlas umanitàrias, linhas rojas o pas. Quand a Daech es pas tan segur qu'aquò qu'aja ideologicament perdut. L'enjòc vertadièr estant non pas d'eradicar l'islamisma, contrariament a çò qu'ara òm fai semblant de creire, mas de manténer a tot prètz la dictatura d'Assad.
Question subsidària : quand es Israël que "passa la linha roja" en se trufant dau drèch internacional, en
s'afranquissent de totas las resolucions de l'ONU e en complissent de crimis de guèrra, de qu'arriba ? Res.Res.Res. Why ? Coma o-cantava lo Dylan, "colèga, la responsa, es dins lo vent que bufa".
Han llançat los iancos 105 missils, n'han derribat los sirians 71. N'han quedat 34. Non hi ha hagut cap mort. Es un poc extranh? Gaita que non sia pas un muntatge.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari