Bandièra01 1180x150: País Invisible

Opinion

L’istòria existís pas (II)

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Doncas en resumit, a la question: L’Istòria, qu’es aquò? Definiscoi un seguici de cinc elements
 
— Hèits, eveniments passats
 
— Comentaris de l’epòca
 
— Tribalh deus istorians
 
— Ensenhament a la joenas generacions
 
— Sentit au demiei de la populacion
 
Vam espiar uèi çò que’n pòt estar deus hèits e deus eveniments. Sèm davant tres cases:
 
— L’eveniment s’es debanat
 
— L’eveniment s’es pas debanat
 
— L’eveniment se debanèc mes es pas ensenhat (véser part 4 de la seria d’articles)
 
Lo hèits famoses que’s son pas debanats son numeroses. Per ne trobar, cau purmèr cercar de cap a los qu’an causada una guèrra, que cau totjorn un pretèxte per començar. Cadun se bremba, sustot los d’un atge madur, de la guèrra au Vietnam miada per l’armada americana. Mès de dètz ans de combats, haut o baish 2 milions de mòrts, civius e militars, vilatges bombardats au napalm, una orror.
 
Ara, dempuèi la daubertura des archius, sabèm que l’ataca nòrdvietnamiana deu 4 d’agost de 1964 contra dus destroyers americans a pas jamès existida. Mes calèva un pretèxte per convéncer lo pòble american d’entamenar una operacion militara.
 
Tot parièr, l’ataca polonesa contra lo relai radiofonic de Gliwice / Gleiwitz, aperada “Operacion Himmler” (31 d’agost de 1939), estoc complètament creada per hèr créser a una agression, que permetoc l’invasion tanvau l’endeman de Polonha per la Wehrmacht, lo 1èr de seteme, començant atau la IIau Guèrra Mondiala.
 
Ara ac sabèm, mes imaginatz s’èra agit de quicòm que’s seré debanat a l’Edat Mejana o dens l’Antiquitat …
 
Un aute exemple: a Tolosa trobaratz devath lo nom de Clemença Isaura una carrèra, un collègi, una grèpia, una associacion umanitària, una gabarra, una estatua, e uns pertrèits. E totun, ara ac sabèm, aquesta dauna a pas existit. Los set trobadors, a l’origina de la creacion de l’Academia deus Jòcs Floraus, la purmèra deu monde, an atribuit l’idèia a una dauna d’aqueste nom. Segon daubuns, seré un omenatge a la beutat femenina dens la tradicion tolosenca, segon d’autes, seré estat per evitar de pagar talhas. Es mens poetic …
 
Doncas l’Istòria es basada sus l’interpretacion, l’estudi, los comentaris e recèrcas sus hèits qu’an benlèu pas existit. Mes, me diseratz, per çò de l’epòca modèrna, pas nat dobte es permetut. E totun …
 
Se las batestas d’Alesia o de Peitieus balhan un brave dobte sus lor existéncia o lors quitas consequéncias, lo chaple de Timişoara, eth, se debanèc (o meslèu l’ahar deu faus chaple) i a pauc, en 1989. E se parli de las Armas de Destrusida Massiva qu’Iraq a pas jamès possedidas, s’agís pas d’un hèit stricto sensus, mes nos mia a l’annada 2003.
 
Aquò pròva que sèm pas protegits d’informacions sus eveniments inventats, relaiats, per l’ahar romanesa, per mèdias totun importants coma Le Monde, Libération, El País, o The New York Times.
 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

LECLERCQ Joan-Marc
2.

#1 Solide, que pòt existir, mes lo problèma es que pas degun ac sap, qu'es pas brica ensenhat a l'escòla, sonque la de Peitieus.

  • 1
  • 0
Ròdrigo Bigòrra
1.

Adixatz, batalha de Tolosa 9 junh 721 eth duc Eudes d'Aquitania qu'arresta eths musulmans davant Tolosa eth capdau musulman eth wali d'Andolosia (governador) Al Sham ibn Malik qu'ei tuat eth dia d'aquera des.heita qu'ei déclarat dia de dòu en islam eth governador d'Andalosia n'ei pas vengut entà divertir'se un òmi d'aquera importancia no vien tot sol mès dab ua grana armada . 25 octobre 732 Carles duc deths francs qu'arresta eths arabes a Moussais ath nòrt de Peitiers aquiu tanben eth wali Abd er Rahman ibn allah , gran emir d'Andalosia qu'ei tuat eras cronicas arabes qu'apèran era batalha aquera (bataha deth pavat deths martirs) si en aquesta epòca eths musulmans ena loas cronicas qu'apèran a un dia de dòu e batalha deth pavat deths martirs que podem totun conclusir que enta'ths quauqu'arren de serios e grèu que s'ei passat ,er'istòria pòt etsistir !

  • 2
  • 1

Escriu un comentari sus aqueste article