Bandièra01 1180x150: País Invisible

Opinion

Cambiament climatic: responsabilitat o conviccion?

François Gemenne
François Gemenne
Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions

François Gemenne, professor a HEC e sòci deu GIEC estoc recentament entrevistat sus France Info au subjècte deus cambiaments climatics. Parlèc de las reaccions deu monde a las solucions perpausadas per baishar las emissions de gazes d’efèit de sarra.

Com l’atz sense de dobte ausit e vist, un fum de monde critican tot çò que pòt estar perpausat. I vesi duas menas de reget:

Un clarament anti ecologic, qu’apèra aquò “l’ecologia punitiva”. Tròban que las eolianas desfacian lo paisatge, que dròlles son espleitats en Africa per tirar los metaus rares per las veituras electricas, que los ciclistas hèn cagar tot lo monde, que las alternativas a la carn pòrtan prejudici a la tradicion culinària, etc …

Generalament venguen d’un mitan haut o baish de dreta, qu’es clarament conservator e, sovent, perpausan pas nada alternativa. Se vei que l’ecologia es per eths quicòm de peniu e sovent son climatosceptics.

L’aute veng de’us que perpausan meslèu una baisha hòrta deus besonhs energetics. Aquò, solide, es condicionat per un cambiament de societat e lo renonç deu capitalisme per un sistèma que seré pas basat suu creish de las activitats umanas.

Dens son entrevista, François Gemenne compara aquesta dusau mena de pensar (“etica de conviccion”) dambe non pas la purmèra, mes aquera deu progrès tecnic que permeterà de manténguer lo nivèu d’activitats en tot hèr baishar l’impact climatic (“etica de responsabilitat”).

Pleteija per la dusau en tot argumentar que lo temps prèssa e qu’aquesta vision destorna una part deu public de l’esfòrç de miar contra lo cambiament climatic.

Es aquò dessùs que soi pas tròp d’acòrdi dambe eth. Au nivèu deu temps, soi pas segur que lo progrès tecnic angue pro lèu e ganhe la corruda contra los grads Celsius.

E au nivèu politic, cau saber que fòrça monde, sustot de ma generacion, se son interessats a fòrmas mès umanas e mès justas de societat abans que lo problèma climatic surgisca. Es mauaisit de botar aquò suu costat e d’i pensar pas mès. Sustot que la crisi deu climat les balha un argument de mès per convéncer las joenas generacions.

 

 


L’entrevista se pòt escotar o legir (en francés) aquí.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article