Bandièra01 1180x150: Comuna de Tolosa

Actualitats

Lo govèrn de Catalonha manda un rapòrt als govèrns estrangièrs per explicar lo procès politic del país

Lo document explica tot çò qu’a fach lo govèrn espanhòl per empedir que los catalans vòten lor futur

Lo govèrn de la Generalitat de Catalonha mandarà aquesta setmana un rapòrt als representants dels govèrns del Mond, e a lors ambaissadas, en explicant tot çò qu’a fach lo govèrn espanhòl per empedir que los catalans vòten lor futur. Se tracta d’un rapòrt elaborat pel Conselh Assessor per la Transicion Nacionala (CATN) qu’analiza los aspèctes mai considerables de las tres annadas passadas; vòl justificar lo caractèr plebiscitari de l’eleccion al Parlament de Catalonha que se celebrarà lo 27 de setembre que ven (dich lo “27-S”).
 
Lo document explica totes los ensages politics qu’an fach lo Parlament de Catalonha, lo Govèrn de la Generalitat e la societat civila per demandar al govèrn espanhòl de Mariano Rajoy la possibilitat de far un referendum tocant lo vejaire dels catalans sus l’independéncia del país. Se tracta d’una seguida d’ensages pacifics, çò ditz lo rapòrt, que seguisson la lei vigenta, en priorizant lo dialòg amb Espanha e amb un grand sosten popular dels catalans.
 
Lo rapòrt denóncia qu’Espanha a fach de pression diplomatica internacionala per descreditar aquel procès, qu’a filtrat als mèdias de documents policièrs falses per estendre la paur dins los catalans e qu’a organizat d’atacs cibernetics contra los sistèmas d’informacion de la Generalitat. Explica tanben las denóncias contra lo president catalan Artur Mas e sa conselhièra de l’educacion Irene Rigau, per aver organizat un procès participatiu lo 9 de novembre, e lo “refús total” de las institucions espanhòlas a totas las proposicions catalanas. Per tant la sola sortida legala e democratica per consultar los catalans es l’eleccion del 27 de setembre que ven. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article