Lo salvament dels 12 enfants tailandeses e de lor entraïnaire blocats dins una cauna inondada a aguda una portada mediatica tala que i auriá ja en cors dos projèctes cinematografics per portar l’istòria al grand ecran. Lo govèrn tailandés seriá darrièr un d’aqueles projèctes.
 
Segon John Penotti, president de la societat productritz, Ivanhoe Pictures, dels Estats Units mas amb preséncia en Asia, la quita armada tailandesa es a negociar amb eles una version cinematografica. De soslinhar que l’armada d’aquel país a agut un ròtle màger dins lo salvament.
 
Segon las informacions que nos son arribadas, aurián quitament causit lo realizaire: l’estatsunidenc d’origina chinesa Jon M. Chu, qu’a assegurat sus Twitter que vòl pas “blanquir” çò que s’es passat. “Vòli pas permetre qu’Hollywood blanquisca l’istòria del salvament de la cauna tailandesa” Aquò se passarà de cap de biais. I a una polida istòria d’èssers umans que salvan d’autres èssers umans. Doncas, qui pense a l’istòria la deu tractar de biais corrècte e respectuós”, çò a dich.
 
En mai d’aquò, lo responsable del salvament a anonciat la creacion d’un musèu que vendrà “una autra granda atraccion”.