Actualitats
Mos a deishats Tònho Castet
Damb eth sòn decès era lengua nòsta pèrd un academician, un musician, un traductor e un gran activista dera lengua
Tèxte legit
Jusèp Antòni Castet Varela, dit Tònho Castet, mos deishec diuendres passat a 67 ans. Damb eth sòn decès era lengua nòsta pèrd un gran activista.
Academician der Institut d’Estudis Aranesi-Acadèmia Aranesa dera Lengua Occitana (IEA-AALO), Castet ère tanplan president e fondador dera Associacion Es Paums tà ajudar era musica, era lengua e era cultura d’Aran, e a promoigut fòrça accions tara dinamizacion dera lengua e dera cultura en Vilamòs, en Aran e en Occitània. Collaborador abituau de Jornalet e de Sapiéncia, Tònho Castet amièc a bon tèrme un grop de convèrsa en aranés ena Universitat de Lhèida, collaborèc coma ensenhaire en Institut Aranés e tradusic tres albums de Tintin e era òbra de Lewis Carrol Alícia en País des Meravilhes, publicada peth Conselh Generau d’Aran en 2019.
Castet ère diplomat en psicologia e auec un mestratge en direccion de vendes, çò que l’amièc a trabalhar en ua societat d’assegurances. Totun, en 2015 decidic de retirar-se a causa deth diagostic d’ua malautia neurodegeneratiua. A compdar d’alavetz consagrèc era sua activitat ara lengua e ara cultura nòstes. Ja en 2013 auie reviscolat era formacion musicau aranesa Es Paums, creada en 1973; aqueth 40u anniversari, en encastre dera hèsta major de Vilamòs, aluguèc un decenni d’activisme lingüistic e culturau.
Bon viatge, paom!
📺 Tintin que parle #occitan damb accent #aranés. Se presentèc en Barcelona 'Es Jòies dera Castafiòre' damb era preséncia deth traductor, @tonhocastet, der editor Albert Mestres e deth director de TV3, Vicent Sanchís, acuelhuts per @llenguacatalana
— #aranésòc (@aranesoc) May 11, 2019
🎥 https://t.co/mpLCxtRsHa 🎥 pic.twitter.com/I9tU3HEkdg
Es sèt meravilhes de Vilamòs (30/09/2016)
40 ans de Es Paums (13/02/2016)
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Soi prigondament desolat. La partida d'aqueste mèstre representa per Occitània tota una pèrda granda. Legissent los articles e las reviradas de Tònho Castet lo me faguèt sentir fòrça pròche malgrat que jamai agèri lo plaser de lo conéisser. Mercés per totes aquestes moments de jòia e de tendresa.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari