Bandièra01 capçalera  1180x150: Novestivada

Actualitats

Castex sosten l’ensenhament immersiu de las lengas autoctònas

Dins una reünion amb los diferents oficis publics e las escòlas del ret Eskolim, a anonciadas de mesuras per desactivar la censura del Conselh Constitucional

Tèxte legit

Lo primièr ministre francés, Jean Castex, a manifestat lo sosten de son govèrn a l’ensenhament immersiu en occitan e en las autras lengas minorizadas de l’estat francés. O assegurèt dins una reünion telematica que la tenguèt lo cap del govèrn dimècres amb los diferents oficis publics de las lengas, dont l’ÒPLO, e las associacions de las escòlas immersivas del ret Eskolim, dont Calandreta.
 
Lo primièr ministre anoncièt la difusion d’una circulara dins las setmanas venentas que deuriá definir l’encastre legal d’aplicacion del sistèma immersiu e tanben la creacion, a l’escala estatala, d’una comission permanenta sus las lengas mal nomenadas regionalas que la presidirà lo quite Castex e que serà interministeriala.
 
A la reünion participèt lo ministre de l’educacion francés, Jean-Michel Blanquer, e los deputats Yannick Kerlogot e Christophe Euzet, autors del rapòrt qu’aviá missionat Castex per “tirar totas las consequéncias” de la decision controversiada del Conselh Constitucional de censurar “l’ensenhament immersiu”. La reünion durèt mai de doas oras e serviguèt mai que mai per se rescontrar après la censura per l’institucion gardiana de Constitucion francesa de dos articles primordials de la Lei Molac dont l’ensenhament immersiu de las lengas territorialas.
 


 

 



 


abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
5.

#2 Castex sosten l’ensenhament immersiu de las lengas autoctònas ? Cossí ?
En fotent Blanquer a la pòrta ? Non… Pensa-te !
En modificant la constitucion per far de França un estat multilenga ? Non…
En establissent una lei indiscutibla que fòrce cada cap d'establiment de collègi e licèu a assumir un ensenhament normal de l'occitan ? Non…
En generalizant las oras especificas fòra DGH per totes los establiments, collègis e licèus que pòdon dispausar d'un professor d'occitan dins totas las academias concernidas ? Non…

Non, non e non : Castex chaupina una circulària que dona de directivas informalas, opcionalas, e d'autorizacions excepcionalas e provisòrias, a la gacha-empega, consideracions revocablas a tot moment, tre que seràn passats los periòdis electorals, e sense anóncia de fonses necessaris…

Coma o dises, Reinat, qui lo pòt creire ? En resumit : nos pren per d'ases.

  • 6
  • 0
ltrobat
4.

Lo Jean Castex que pòt prométer tot çò que vòu, lo hèit que lo Jean-Michel Blanquer ne sia pas sortit deu govern après la soa manóbra limashorda deu mes d'abriu contra la lei Molac qu'amuisha clarament lo purmèr ministre n'a pas nada autoritat sus aqueste dossièr ni suu son ministre de l'Educacion nacionau (au mensh que s'en fótia completament e que hasca anar la flabuteta entà calmar los defensors de las lengas regionaus d'ací a las eleccions presidenciaus).
Donc n'avem pas arren a esperar de las promessas de mossur Castex.

  • 3
  • 0
Api
3.

A tè ! fa plaser de veire que l'amic de macron nos fa pas pus cagar !

  • 8
  • 0
Reinat TOSCANO LO VAU
2.

Un promier ministre que promete de donar de directivas per anar còntra la Constitucion! Mai cu lo pòu crèire? Cresètz vertadierament que se va metre còntra lo Conseu Constitucionau?

  • 9
  • 0
Bodiu
1.

Vertat que las eleccions s'aprosman, alavetz se compreni plan, la censura del conselh constitucional es totjorn aqui, mas, se fariá un amenatjament per fin de recompassar sens la rescompassar la censura del conselh.
Me sembla plan destermenat tot aquò, tan milhor se ne podèm tirar profièg...

Per salvar l'occitan n'en caldriá plan mai !

  • 10
  • 0

Escriu un comentari sus aqueste article