Lo Partit dels Trabalhadors de Curdistan (PKK) a anonciadas oficialament sa dissolucion e la fin de la lucha armada, una decision presa pendent lo dotzen congrès de l’organizacion, que se tenguèt la setmana passada. Segon l’agéncia curda Firat, restacada al movement, lo procès lo bailejarà lo dirigent istoric, Abdullah Öcalan, encarcerat dempuèi 1999 dins una preson de l’illa d’İmralı, ont complís sa condemnacion a perpetuitat per “traïson e separatisme”. A pas drech de recebre de letras, de messatges o de telefonadas. Fa qualques setmanas, aviá facha una crida en aquel sens per facultar un acòrdi de patz amb lo govèrn de Turquia.

Lo PKK afirma que sa mission istorica es acabada, après mai de quaranta ans de lucha armada començada en 1978 en responsa a la negacion de l’identitat curda de part de l’estat turc. “Nòstre combat a fach trantalhar la politica d’anequeliment contra nòstre pòble e a plaçada la question curda a un ponch que pòt èsser resolgut mejançant la via democratica”, çò a declarat l’organizacion.

Lo congrès amassèt 232 delegats e se clavèt sus la presa “de decisions istoricas que començan una nòva èra pel movement per la libertat”. Lo comunicat del PKK remembra tanben los multiples ensages d’Öcalan per entamenar de procèsses de patz, coma l’alta al fuòc dels ans 1990, malescasut segon lo grop a causa de la temptativa d’assassinat del president turc Turgut Özal per un militant turc anticomunista. A comptar d’alavetz, l’escalada de violéncia a provocada una guèrra devastaira: de milièrs de vilas evacuadas, de milions de desplaçats, e una repression generalizada contra lo pòble curd.

Ara, amb aquesta virada estrategica, lo PKK escomet per una resolucion politica e democratica del conflicte. Lo periòde armat es acabat, mas lo movement curd afirma que contunharà de se batre pels dreches de son pòble per de mejans pacifics.

Lo congrès del PKK se tenguèt en seguretat malgrat las condicions advèrsas degudas als afrontaments militars, a las atacas aerianas e terrèstras, al sètge que lo patisson los territòris governats pel PKK e a l’embargament impausat a la region autonòma del Curdistan iraquian.

#BREAKING: Firat News Agency (ANF), affiliated with the Kurdistan Workers’ Party (PKK), has released footage of the PKK’s 12th congress, where the group announced its decision to disarm and disband in response to a call from imprisoned leader Abdullah Ocalan.

🎥: ANF pic.twitter.com/CBTxEebxoX

— Zoom News (@zoomnewskrd) May 12, 2025